Daspö marculdi, ils 20 meg bivgnainta il Museum Engiadinais darcho als visitaduors, s’inclegia tenor tuot las imsüras necessarias da protecziun chi sun gnidas elavuredas da l’Associaziun dals Museums Svizzers ed adattedas a nos museum.

Las stüvas chi sun per part 500 ans veglias e las collecziuns in parada vegnan visitedas individuelmaing da noss giasts cul tablet-guide chi vain miss a dispusiziun e vain cunagieu cun premura zieva minch’adöver. Ad exista eir l’alternativa da charger tuot las infurmaziuns sül Smartphone persunel dals visitaduors. Specielmaing eir ils iffaunts haun gugent la guida dal museum chi do bgeras infurmaziuns interessantas davart ils ogets exposts e l’istorgia engiadinaisa in möd intuitiv, multifar e surprendent cun purtrets, tun e text.

Sper l’exposiziun speciela da success „Hartmann – architectura d’üna famiglia“ mussains nus eir inavaunt la pitschna exposiziun in basa ad üna collecziun chi’s nomna „Dal rendacrüs-chas a la chabgia da squilat. Bes-chas co e lo da la collecziun Campell“ cun ogets scu üna granda trapla dad uors u üna trofea da chatscha chapitela.

Glieud domicilieda in Engiadina survain l’entreda redotta, per iffaunts fin 16 ans es la visita gratuita.